عتاب ومشاريه
 | ||
| اشوف بعيونك عتاب ومشاريه | لا ينشغل بالك رجيتك ياغالي | |
| ان كان في خاطرك علم ٍ ومخفيه | قوله ترى صدري لمثلك شمالي | |
| قوله ترى صاحبك يكفيه ما فيه | لا تحسبنه من عنا الوقت سالي | |
| وقت ٍ عسى رب المخاليق يسويه | يصفي لنا في باقيات الليالي | |
| الله على بحر الغرام وشواطيه | وياجر قلبي جر من ما جرالي | |
| انت الوحيد اللي عيوني تراعيه | ارتاح في قربك واشوفك قبالي | |
| والخاطر الحساس منهو يسليـه | لا غبت ضاق الكون من ضيق بالـي | |
| وشلون انا اقوى للمفارق وطاريه | وشلون انا امحـى صورتك من خيالي | |
| الشعر في حضرتك محـلا قوافيه | لا يابعد عمري وياراس مالي | |
| اول عيونك صافي الود تعطيه | ونار ٍ من الاشواق تشعل شعالي | |
| واليوم بعيونك عتاب ومشاريه | مانته على خبري من اول ياغالي | |
ركني الهادي يحمل اعذب القصايد من شوارد الافكار وبوح الخاطر عسى ان ينال على اعجابكم..... عبدالرحيم سعد اليابسي المطيري